كما تُدين تُدَان

*********

*********

(بسم الله الرحمٌن الرحيم)

*

إِن يَمْسَسْكُمْ قَرْحٌ فَقَدْ مَسَّ الْقَوْمَ قَرْحٌ مِّثْلُهُ وَتِلْكَ الأيَّامُ نُدَاوِلُهَا بَيْنَ النَّاسِ وَلِيَعْلَمَ اللّهُ الَّذِينَ آمَنُواْ وَيَتَّخِذَ مِنكُمْ شُهَدَاء وَاللّهُ لاَ يُحِبُّ الظَّالِمِينَ.

*

(صدق الله العظيم )

أول تاج ...وأحلى تاج ..تاج العيد

قاعدة كدة فى حالى لا بية ولا علية
بعد ما رجعت من أجازة العيد
ألاقى أختى العزيزة ( صدى الصمت ) مدبسانى فى تاج !!!!!
هية دى العيدية اللى باعتاهالى ؟؟؟
على العموم عيدية مقبولة ونبدأ الإجابة .......
ماذا يمثل لك العيد ؟وما أكثر شئ يبهجك فى مظاهر العيد ؟
أجازة ، وزيارات ، وسفر لبلدنا ، ورؤية الأهل
*ــــــــــــ*ــــــــــــــ*ـــــــــــــ*
أوصف لنا طقوسك فى العيد من ليلة العيد لآخر يوم ؟
ياااااااااة دى كتيييير أوى إنتو قاعدييين ؟؟
*ـــــــــــــ*ــــــــــــــ*ــــــــــــــ*
احكى لنا أطرف موقف حصلك فى العيد ؟
أخدت أختى الصغيرة معايا أفسحها شوية وكانت لسة بتتشال
وأنا شايلاها الجزمة وقعت منها
(والسهتانة فضلت ساكتة وما قالتش حاجة )
ولما تعبت وحبيت أخليها تمشى طبعا ً ما كانش ممكن تمشى حافية
وفضلت شايلاها على قلبى طول الفسحة وكانت فسحة لا تنسى
*ـــــــــــــــ*ــــــــــــ*ــــــــــــــ*
بتحرص على تهنئة الأهل والأقارب والأصدقاء ولا مش بتهتم ؟
طبعاً باكلمهم وهمة برضة بيكلمونى
*ـــــــــــــ*ـــــــــــــــ*ـــــــــــــ*
مين أول حد تزورة أو تكلمة عشان تهنية بالعيد ؟
الوالد طبعاً ربنا يخلية لينا وبعدين خالاتى عشان بيفكرونى بالمرحومة والدتى باحس وانا بأكلمهم إنى بأعيد عليها
*ـــــــــــ*ـــــــــــــ*ـــــــــــــــ*
إية الفرق بين العيد الحالى والعيد أيام الطفولة ؟
العيد الحالى أنا باحس إنة مالوش طعم أما زمان كنا بنستنى العيدية والبمب والخروج والملاهى
*ـــــــــــــــ*ــــــــــــــــ*ــــــــــــــ*
كلمنا عن ذكرياتك فى العيد ؟
نشترى لبس العيد ونسهر لحد الفجر ونتفرج على صلاة العيد فى التليفزيون
ونشوف دبح الخروف وبعدين ننزل نلعب مع بنات الجيران ونصرف العيدية كلها وبعدين نرجع ننام مقتولين
*ـــــــــــــ*ـــــــــــــــ*ــــــــــــــــ*
تفتكر الحياة من غير عيد هتفرق كتييير ؟
طبعاً هتفرق أمال نأخد أجازة إمتى بقى لو ما فيش عيد .؟!!!!
*ـــــــــــــــ*ـــــــــــــ*ـــــــــــــــــ*
إية أجمل رسالة تهنئة بالعيد وصلتك ؟ومن مين ؟
بأجمل حروف
وبصوت ملهوف
وأنا مكسوف
والنبى والنبى حتة لحمة من الخروف
وصلتنى من أختى العزيزة ( صدى الصمت )
*ــــــــــــــ*ـــــــــــــــــ*ــــــــــــــــ*
لسة بتاخد عيدية ؟من مين ؟ وبتديها لمين ؟
للأسف لأ لكن الوالد ربنا يخلية لينا بيدينا عيدية مقنعة
يعنى فى العيد الصغير يجيب لنا الكحك والبسكوت
وفى العيد الكبير يفتكرنا باللحمة
أما بقى بندى عيدية لأولاد أخواتى وأولاد أخوات جوزى
وما أقولكوش بقى اللهم لاحسد العدد فى اللمون
*ــــــــــــــــ*ــــــــــــــــ*ـــــــــــــ*
إية رأيك فى التاج ؟
جميل جداً وخلانى أفتكر حاجات كتيييييير
*ـــــــــــــــ*ــــــــــــــــ*ــــــــــــــ*
تحب تمررة لمين ؟ أذكر 10على الأقل ؟
بما إنى وصلنى التاج متأخر أو أنا اللى وصلتله متأخر
بعد عودتى من البلد فأنا بأهدية لأخى المراكبى
وبعد كدة اللى عايز ياخدة يتفضل هدية منى لية
سلااااااااااام
وكل عيد وانتوا طيبين

متاعب المهنة

بما إنى صحفية جامدة ولازم أكون مهتمة إنى أعمل مواضيع وخبطات صحفية
فى المجلات اللى باعملها (اللى هية المجلات والصحف الحائطية )
فتلاقوا عقلى دة شغااااال على طوووول
الموقف دة .... يتعمل كاريكاتير هايل
والحكاية دى تنفع نكتب عنها مقال
أما بقى الموضوع دة فينفع يتعمل مجلة جامدة
وأهم حاجة يكون فية صور حية ( يعنى صور فوتوغرافية متصورة بأيدى )
( أنزل للمكان وأصور بنفسى )
ومن هنا كانت البداية ...
أنا دايماً ماشية والكاميرا فى شنطتى
معمرة بالفيلم .... وجاهزة للنشان والتصويب على أى حاجة
وهووووب .... تك ... ألقط الصورة وأطلع أجرى
وخصوصاً لو كانت صورة لموقف غلط
أما بقى اللى حصلى المرة دى فهو كالتالى .....
فى اليوم ال .. (الأبيض دة ) لقيت واحد واقف بعربية كبدة أمام المدرسة
( سامعة واحد فيكوا بيقول : طب ماهوعادى )
لكن أنا بقول عادى ليك انت لكن أنا بقى بحاستى الصحفية ونظرى الثاقب
( هئ هئ هئ .. أيام ما كان عندى نظر )
قلت دة موضوع حلو ينفع يتعمل مجلة
وأنتو عارفين بقى نتكلم عن الباعة الجائلين ،
وخطورة اللى بيقدموة للطلاب ( اللى همة أولادنا ) ،
على كلمتين مزوقين عن السم اللى بيتباع أمام مدارسنا ،
وحلمت بجائزة المركز الأول
واتلطشت فى مخى بقى ورحت مطلعة الكاميرا
ويادوووووب باظبطها عشان آخد اللقطة
فجأة ......
لقيت واحد من طلاب المدرسة الحلوييييين ، الطعمييييين ، الناصحييييين
( اللى كنا خايفين عليهم )
بيزعق بعلو صوتة :
إلحق يا بتاع الكبدة ... حيصوروووووك
إضحك بقى يا عم عشان الصورة تطلع حلوة
وبس خلاص .....
طبعاً عينكو ما تشوف إلا النور......
آآآآآآآآآة لو حد يطولنى رقبة الولد اللى اتكلم
لا حيهمنى بقى منع الضرب .. ولا النشرة الحلوة اللى مضينا عليها بالعلم
يتفضلوا بقى المسئولين فى الوزارة ييجوا يقفوا مطرحى
وبعدين يبقوا يقولوا الضرب ممنوع والا لأ ...
على العموم آدى آخرة الإخلاص فى العمل
وقليل من متاعب المهنة
ملحوظة :

الزيارة حالياً ممنوعة و لكن نقبل الورود وبعض الفاكهة

البيضة قبل الفرخة ؟؟ والا الفرخة قبل البيضة ؟؟

الفترة اللى فاتت حاولت إنى التزم الصمت وأبعد عن الكلام فى موضوع ضرب المدرسين للطلاب
لكن بعد نشر كام خبر من دول فجأة خلوها ظاهرة
وعشان كدة لقيت نفسى غصب عنى لازم أتكلم
لإن السكوت ما فيهوش فايدة بعد ما بقى الكلام علينا على إننا إرهابيين ( و يمكن نطلع تبع بن لادن )
فى البداية أحب أقول إنها مش ظاهرة .. لية بقى ؟؟
لو كل واحد فيكم فكر شوية وافتكر أيام التشرد وهوة فى المدرسة حيفتكر كام مقلب سخنين كدة عملهم فى المدرسين
وإزاى كان فى الآخر ممكن ياخد كام خرزانة من المدرس وممكن توصل إنة يتعبط فى الطابور أو يتمد على رجلية
( و الله يرحم أيام الفلكة ... مش كدة والا إية ؟؟ )
طيب سيبك من المدرسة ..
بقى يعنى بزمتكم ما حصلش إن الست الوالدة جريت وراكم بالشبشب و إنتو ملففينها وراكم الشقة كلها ؟؟
طب الوالد ما قامش عليك مرة ورزعك قلم محترم عشان رديت رد مش عاجبة أو إتكلمت بطريقة غلط ؟؟
والنتيجة أهى ... إتعدلت ، و إتربيت ، و فلحت
طب سؤال كمان لو سمحت : حضرتك دلوقت ما بتضربش ولادك لما بيغلطوا ؟؟
يعنى أنا إتضربت ، و إنت إتضربت ، و أهالينا إتضربوا ......
أمال أية الجديد ؟
لية الدنيا دلوقت قايمة عشان الطلاب بيتضربوا ؟؟
الجديد هوة ظاهرة ( العنف )
الواضح إن المدرس دلوقت بقت روحة فى مناخيرة من كثافة الفصول
( الفصل وصل أكتر من 60 طالب و فى بعض المدارس 90 طالب )
و مع أى تصرف مش مظبوط من الطالب بيضطرالمدرس إنة يواجهة لإنة لو سابة حيبقوا 60 تصرف غلط
وحسب رد فعل المدرس بقى .. و ممكن يكون رد فعل عنيف جداً ( لكن أكيد بيكون مش قاصد يرتكب جناية )
( و المواقف اللى مش ولا بد من الطلاب كتيييييير .. و بصراحة المدرس الله يكون فى عونة )
وانا هنا مش عشان أدافع عن المدرس اللى قتل طالب لأ أنا رأيى : ( إن من قتل ... يقتل )
لكن أنا باوضح إن ظاهرة العنف دى عامة على المجتمع كلة
والمدرسة ماهى إلا تجسيد للى بيحصل فى المجتمع
يعنى دلوقت تلاقى فى المدرسة الطالب اللى بيدخن ، وتلاقى البانجو والشذوذ بين الطلاب
والتحرش بالطالبات سواء بالمعاكسة أو وصلت حتى لمد الأيد
( و مش حتصدقوا إن دة من طلاب الإبتدائى .... أمااال عملية صياعة مبكرة )
كمان تلاقوا الخناق بالمطاوى والمدرس يبقى مش عارف يخلص الخناقة إزاى ( وممكن يروح فيها )
و ممكن ييجى طالب مونون على الآخر وشارب كام سيجارة بانجو ويا سلام لو كانت لجنة إمتحان
ولو جدع بقى راقب علية وقولة ما تغشش
( فى الحالة دى الكل بيستخدم إسلوب لا أرى .. لا أسمع .. لا أتكلم ... إحنا عايزين نربى العيال)
وبعد حكاية منع الضرب فى المدارس بقيت مش عارف تتعامل مع الطالب إزاى
ممنوع الضرب ، و ممنوع الشتيمة ، و ممنوع التزنيب ، و ممنوع الفصل ( فى الأبتدائى والإعدادى )
طب الحل إية ؟؟
آآآآآآآآآة لية كبيييير يترد علية إبعتولة إستدعاء ولى أمر
ييجى ولى الأمر و أول ما تتكلم معاة تعرف على طول الولد كدة لية!!
يعنى ممكن يكون الأب هوة اللى عايز إعادة تربية
وأحياناً ما يقتنعش أبداً إن إبنة بيعمل حاجة غلط .... إبنة ملاك وإحنا بقى مستقصدينة
وعودة لظاهرة العنف اللى توغلت و انتشرت فى المجتمع
فانت بتلاقى خبر: أم تقتل إبنها ، و أب يضرب إبنتة حتى الموت ، وإبن يضرب أمة لأنها ما إدتلوش فلوس
وغيرها كتيييييير من الأخبار اللى توجع البطن
يبقى زى ما قلت العنف ظاهرة عامة فى المجتمع و المدرس فرد من المجتمع
ولما يكون هناك عنصر فاسد فدة مش دليل على إن الكل فاسد
و بالمرة بقى خدوا عندكوا الدليل على إنهيار القيم والأخلاق والإحساس فى المجتمع
إسمعوا النكتة دى :
( مرة واحد شاف أمة مولعة .. قالها والله منورة يا حاجة )
وللعلم النكتة دى طالعة من مدرسة ثانوى بنين
يبقى تفتكروا المستقبل حيكون شكلة إية ؟؟؟!!!!
مش قلتلكم الغلط فى المجتمع كلة
يبقى المجتمع ينصلح ... تتصلح المدرسة .... ، و تتصلح المدرسة ينصلح المجتمع
( والبيضة قبل الفرخة ؟؟ والا الفرخة قبل البيضة ؟؟ )

أنا نجحت يا هوووووووووووه

إلى كل أعضاء البلوجر ... و كل أصحاب المدونات ...
و كل القراء ....... و أيضاً عابرى السبيل

إليكم آخر خبر .....

أنا نجحت فى إمتحان الكادر

تصوروا ؟ ؟ !!!!!!!!

و لذلك و من موقعى هذا.. و بعد هذا النجاح الساحق ( الغير متوقع )
أعلن أننى بهذا قد أصبحت من أصحاب الكادرات ..
وطبعاً بعد حصولى على المرحلة الثانية من الكادر ....
( حنلعب بالفلوس لعب )

و أن هذا النجاح يثبت أن الكمبيوتر ( اللى كان بيصحح الإجابات )
كان بة فيروس أو إنة أصابة الإرهاق من كثرة التصحيح
و لذلك هنج و تعب و بدأ يلخبط

أما إذا كان الكمبيوتر سليم
فهذا يثبت فاعلية الطريقة المثلى للحل و التى سبق التنوية عنها فى بوست سابق
و هى طريقة ( حادى .. بادى .. كرنب .. زبادى )
و لذلك أدعو إلى نشرها بين جميع الطلاب و(لى الأجر و الثواب )

لكن فى النهاية طبعاً ما حدش يقدر ينكر أنى أستحق الفرحة بالنجاح
لأن النتيجة مش ولابد واللى نجح فلت وعدى
والحمدلله أنا فلت من شماتة الولاد
وأقدر دلوقت أكلمهم فى النمر الحلوة والوحشة
بدل ما كانوا يقولولى :
( ما بلاش انت .. و خلى حد تانى يتكلم )

بس حقيقى حقيقى ... النجاح .. حلو ... جداً جداً جداً

أدامة الله علينا جميعاً

إمبراطورية ميم

أنا بأحب فيلم إمبراطورية ميم جداً وكل ما يتعرض فى أى قناة لازم أقعد أشوفة وأتخيل نفسى فاتن حمامة (مش فى الشكل طبعاً)
لكن فى كل المواقف اللى بتقابلها و خصوصاً مع أولادها
تتصوروا إنها ما فرقتش كتير رغم مرور السنين الكتيرة من يوم عمل الفيلم حتى يومنا هذا؟
كمان المواقف اللى بتشوفها بحكم مهنتها اللى هية مهنتى دلوقت (التعليم) هيه .. هيه
لم يختلف شىء وتقريباً حتلاقوا نفس الكلام بيحصل دلوقت
لكن اللى أنا عايزة أقولة وأكد علية هوة كلام إبنها الكبير (مصطفى) لما قال :
إن البلد مافيهاش حاجة بتتعمل إلا لو قام مسئول كبير وإتكلم فى الموضوع
والشارع اللى فية حفر ومطبات ما بيتصلحش إلا لو عدى فية شخص مسئول كبير
(والموظف بيكدب على رئيسة ورئيسة بيكدب على رئيسة)
يا ترى شايفين إن الكلام دة غريب ولا لسة بينطبق علينا حتى الآن؟؟
أنا بقى بأفتكر الجملة دى كل ما تبدأ السنة الدراسية وأبدأ أجهز سجلات الشغل
من إذاعة وصحافة وأقعد أقسم كل سجل إلى :ـ
الخطة ، أسماء أعضاء الجماعة ،الإجتماعات ،التقارير الشهرية…..وغيرها كتير
وتبدأ السنة الدراسية وتمر وطبعاً ما فيش إجتماع واحد يوحد ربنا يتعمل مع الطلاب
يمكن لإنى بأقابلهم كل يوم واللى عايزاة بأقولة على طول من غير ما أستنى إجتماعات؟
وكمان بيجولى فى الفسحة كل يوم ونقعد نجهز برنامج الإذاعة لليوم التالى
يبقى اية فايدة الإجتماع بقى؟
يعنى فى الواقع وعلى الطبيعة ما فيش إجتماعات
لكن تعالوا إتفرجوا على السجلات متستفة ومتوضبة وجاهزة لأى تفتيش
يااااسلاااااااااااااااام..مافيش أحسن من كدة
إجتماعات إية والمناقشات اللى دارت فيها ورأى الطلاب والقرارات النهائية
وفى آخر كل شهر تقرير محترم عن إنجازات الشهر
(اللى غالباً ما إتعملتش كلها)
وأقدم التقرير لوكيلة النشاط اللى المفروض كانت معانا فى الإجتماعات
وأقول لها: شاهدة؟ تقول : طبعاً حصل .. على يدى
وتاخد التقرير تسجلة عندها ولما ييجيلها تفتيش تقدمة بكل إفتخار وهية بتقول:
شوفوا شطارتنا النشاط عندنا مية مية وزى الفل
والمتابعة اللى جاية من الوزارة أو الإدارة تاخد التقرير وترفعة لرئيسها وتقولة:
شايف المدرسة اللى بأشرف عليها ماشية كويس إزاى؟
آدى الشطارة وإلا بلاش
المهم فى الموضوع إن ورقك تمام وسجلاتك كاملة تمشى معاك الحكاية
سجلك ناقص يا بية ما أقولكش حيحصل إية
فاكرين عادل إمام لما كان بيقول : بلد شهادات صحيح؟؟
أهى دى بقى اللى إتغيرت وبقت بلد ورق صحيح
وفى النهاية تظل كلمة (مصطفى) فى إمبراطورية ميم خالدة باقية حتى الآن
ومش عارفة حتفضل كدة لحد إمتى
(الموظف بيكدب على رئيسة ورئيسة بيكدب على رئيسة)
وعــجــبــى !!!!!!!

إلا..المجاهرين

عن ابى هريرة رضى الله عنة قال:سمعت رسول الله صلى الله علية وسلم يقول :
(كل أمتى معافى إلا المجاهرين،وان من المجاهرة أن يعمل الرجل بالليل عملا،
ثم يصبح وقد سترة الله علية فيقول:يا فلان..عملت البارحة كذا وكذا،وقد بات
يسترة ربة، ويصبح يكشف ستر الله عنة) صدق رسول الله صلى الله علية وسلم
انا حبيت ابدأ كلامى بالحديث الشريف دة لأنى لاحظت بعض التصرفات الغريبة
والدخيلة على مجتمعنا ودة من السنة اللى فاتت فمثلاً بدأت الحكاية كالتالى....
البداية...
راجعة بالبنات من المدرسة وكنا فى رمضان وفى عز الشمس
البنات آخر تعب وميتين من العطش وخصوصاً البنت الصغيرة عشان كانت
لسة أول مرة تصوم وما اتعودتش
فجأة عند البيت نلاقى شاب ساند على العربية
وبكل بجاحة بياكل شيبسى ..
طيب انت متنيل فاطر حبكت تفطر قدام الناس كلها؟؟؟!!!!
الموقف الثانى..
راجعين من الشغل طبعاً قبل الفطار
نلاقى قدامنا شوية شباب بيهزروا مع بعض.. هزارغلس حبتين
يعنى هزار بالضرب مع شوية شتايم متنقية
دة مش مهم... اصل احنا متعودين على الحاجات دى بنشوفها وبنسمعها كتيييير
فى الشارع دة.. لأن فية مدارس كتيير ودة تجمع شباب وبنات
اللى لفت نظرنا طبعاً ان الشباب برضة بكل بجاحة وقلت أدب بيشربوا سجاير
طيب فين الصيام ؟وكمان كدة جهراً فى الشارع؟
الموقف الثالث..
رايحة اشترى عقبال عندكوا كدة (فرخة) الاقى شابة جاية برضة تشترى (فرخة)
ويظهر ان الراجل بتاع الفراخ عارفها فضل يهزر معاها ويسألها على عيليتها
نفر.. نفر.. و..نفراية.. نفراية
وفجأة لقيتها بتقولة ممكن اشرب يا عم(....)؟؟!!!!!
انا استغربت بس قلت يمكن تكون مسيحية
لكن هوة رد عليها وقالها لية؟هوة انتى مش صايمة؟
تقوم بمنتهى البجاحة تقولة :لأ ...اصلى عيانة و واخدة دواء
يعنى خلاص مش قادرة تستنى لما تتهبب تاخد الفرخة وتروح تتسمم فى بيتها؟
ويا ترى هية عيانة قوى كدة عشان تفطر؟؟!!!!!!
دى أيام رمضان ما تتعوضش ومهما كان الواحد فية بيصوم ونفسة رمضان ما يخلصش
دة حتى الصيام بالذات حاجة بين العبد وربة
ما حدش يقدر يدخل جوة كل واحد ويقول دة فاطر.... ودة صايم
تقوم الناس دى بكل تلامة تقول للكل :احنا اهو فااااااااااااااطريييييييييييييييين
هوة دة الجهر بالذنب
وخد عندك بقى مواقف كتييييييييير من دى
يعنى الحكاية كبيرة ومش هينة
وصحيح..اللى اختشوا....ماتوا
ولو كل واحد بص حوالية حيلاقى من العينة دى كتيييييييييييير
ياترى إية اللى حصل؟؟..والناس بقت كدة لية؟؟

يوم الإمتحان يهان المعلم..أو..يهان

إية رأيكم ياجماعة... نتكلم جد شوية؟؟
يا ترى فية حد عمل دة فى الموظفين بتوعة قبل كدة؟؟
يعنى بعد شغل وخبرة 30 سنة والناس خلاص طالعة معاش فجأة دلوقت بقو مش نافعين؟
احنا مش معترضين على الإمتحان للترقيّة لوظيفة أعلى
لأن دة شئ متفق علية ومعمول بية من زمان ..بس ازاى بقى؟
كان اللى حيترقى يدخل تدريب لمدة اسبوع أو اثنين متصلين وفى الآخر يمتحن فى اللى أخدة طول التدريب
واللى بينجح بس هوة اللى بيترقى
يبقى مبدأ الإمتحان مش مرفوض من المدرسين يعنى مافيش مشكلة فى الإمتحان نفسة
أمال فين المشكلة بقى؟!
المشكلة فى اننا رايحين نمتحن فى المجهول،وفجأة،ومن غير تدريب
يعنى تيجى دلوقت وتقولى حادخلك امتحان فى الحاجات اللى أخدتوها فى الكليّة!!
شوف الناس سايبة الكليّات بقالها أد إية؟
طيب بلاش دى ...
جوة الكليّة فية تخصصات يعنى احنا مثلاً كنا صحافة واذاعة وتليفزيون،
لكن مانعرفش حاجة عن المسرح والسينما
تخيلوا بقى إن فية على الأقل 6 أو7 أسئلة من التخصص جت فى السينما والمسرح
طيب احنا نعرف عنهم إية عشان نحل؟!
والعكس صحيح للى كانو تخصص مسرح ما يعرفوش حاجة عن تخصصنا
يبقو يحلو ازاى؟ وللصراحة بقى ..همة كانت مصيبتهم أكبر
و حتلاقى نفس الحكاية فى كل الكليّات وبالتالى الكل خرج من الإمتحان مش عارف حل إية
أما أسئلة التربية دى بقى كانت ما لهاش حل أصلاً
إشى نظريات مانسمعش عنها ،وعلماء مش عارفين ننطق أساميهم،وأسئلة مش عارفينها عايزة إية
ولا العربى بقى مااقولكوش...
أنا معاكو إنها لغتنا ولغة القرءان ولازم نبقى عارفينها
لكن لما يبقى مدرس لغة إنجليزية مثلاً وشغال فى مدرسة لغات أو تجريبية
حيعمل إية باللغة العربية؟ والنحو اللى اتنسى من زمان وخلاص بقى ما بيستخدمهوش
ولا لما مديرة مدرسة كانت فى الأصل مدرسة فرنساوى وبقالها 10 سنين مالهاش أى علاقة بالمادة
وفجأة تلاقى نفسها قاعدة فى الإمتحان وبيسألوها فى (الجراميير) ولازم تجاوب
مش كانت عاملة علينا مديرة تورينا شطارتها بقى
وعشان كدة قام الجميع باللجوء للحل السحرى والفعال فى حل معظم الأسئلة وهوة...
حادى... بادى...كرنب زبادى... شالو وحطو ...وكلة على دى
خلاص ..يبقى نختار المرة دى الإجابة(ب)...يالا ماهي خربانة ..خربانة ويمكن تيجى مع العمى طابات
وهكذا استمر العمل بهذة الإستراتيجية حتى آآآآآخر الإمتحان....يبقى بعد كدة.. تفتكرو حننجح؟؟
المشكلة بقى إن الوزير لما سألوة ازاى تمتحن المدرسين من غير تدريب ؟
قال:أصل أنا عايز أعرف مستواهم الأول وبعدين أبقى أدربهم
ياسلااااااام شفتو بقى الهنا اللى احنا فية
يعنى تجيب أسئلة غير قابلة للحل،وأسئلة تانية كنا خلاص نسيناها بقالنا سنيييين،
وتطلعنى فاشل ومش فاهم حاجة قدام نفسى ،وقدام ولادى ،والطلبة بتوعى ،
ونبقى اللى ما يشترى يتفرج علينا بعد ما تطلع النتيجة على النت
وأصغر طالب حيدخل بجنية عند أى محل نت ويعرف أسامى كل المدرسين اللى سقطو
وبعدها مش حنساوى حتى ربع جنية
ازاى حتكلم الطالب ويسمع كلامك وهوة عارف انك ساقط؟
شكلى حيكون إية قصاد ولادى لما أصحابهم يسألوهم :إلا مامتك عملت إية فى الإمتحان؟
والجميل بقى واللى يشل بصحيح الشعار اللى مكتوب على أى حاجة خاصة بالكادر
بالبنط العريض(كادر المعلم..لأن المعلم يستحق أفضل مكانة اجتماعية ومهنية)
بالزمة بقى بعد كل اللى جرى دة وبقينا مسخرة والبلد كلها بتستهزأ بينا
لسة لينا حتى ولو ربع مكانة اجتماعية أو مهنية؟
وإشى كاريكاتيرات ومقالات ومناشدات... ولا حياة لمن تنادى
طيب والمدرس اللى حينجح بعد ماعمل كونسولتو فى اللجنة وحل حل جماعى
ويالا ياجماعة اللى عارف حاجة يقولها
خلاص حيبقى هوة دة المدرس الفلتة النابغة اللى يستحق يبقى مدرس؟؟!!
أكيد الإمتحان دة مش مقياس بس يا ترى الطلبة حيفهمو دة؟
همة مصممين على إن المهزلة دى تتم حتى النهاية
وكل المدرسين جواهم إحساس واحد.. إن كل الفيلم دة عشان مايدوناش النص التانى بتاع الكادر
أصلهم لقونا مستموتين وماصدقنا شبطنا ...
قالو يا إما نزهق ونقول خلاص حرمنا..أو نسقط بقى وتبقى جت مننا
طيب شوفو معايا واحسبو المصاريف اللى اتدفعت فى تكاليف الإمتحان
ورق اجابة،وكراريس أسئلة،وأرقام جلوس،ولجان ،ومراقبين(ولا يعنى حيشتغلو لله وللوطن)
وكنترول،و..و
تعرفو إنى سمعت والله أعلم إن المراقب من دول حياخد100ج فى اليوم!!!!
يعنى حلال ولا حرام دة الكادر كلة 100ج فى الشهر...إية كتير علينا؟!
ياترى ال100ج دول يساوى كل الذل اللى اتزليناة
مجرد سؤال
على فكرة أنا كدة قلت كل اللى فى نفسى
وأعتقد إن دة اللى جوة كل المدرسين
أما بقى حكاية اللى حصلى فى يوم الإمتحان فدى بقى حكاية تانية حابقى أحكيهالكم بعدين

حسبة برمة

اليومين دول إحنا محتاسييين آخر حوسة ومش عارفين نبدأ بأييييية
يا ترى نروح ندفع مصاريف المدرسة؟
ولا نشترى هدوم المدرسة،ولا مؤاخذة يعنى الجزم؟
ولا أقولكم...نروح نلف شوية على هدوم العيد عشان البنات
واهو قدامهم كدة أد كاااام يوووم على ما ينقوا ويختارو
لأ..لأ..أحسن نشترى حاجات رمضان واهو خلاص كل سنة وانتو طيبين بقى على الأبواب
يووووة....
الواحد اتلخبط خالص
طب نرتبها كدة ونشوف إية اللى حييجى الأول؟!!
آآة ..يبقى نشترى حاجات رمضان..
بس دى المدرسة عايزة المصاريف دلوقت!!
طيب خلاص ندفع المصاريف..وبلاها حاجات رمضان
نمشيها شوية قمر الدين وكركدية..
يعنى هوة احنا لو ما عملناش خشاف.. مش حيبقى رمضان؟!!
وبعد كدة نجيب هدوم العيد..دة حتى الأوكازيون بدأ..ودى تبقى فرصة
بس الحاجة اللى تزعل فى الموضوع دة إن الهدوم دى حتبقى صيفى.
(يعنى مش حتنفع فى العيد الكبير)..دة إية الحظ دة
على العموم.. لما يبقى ييجى العيد الكبير يبقى يحلها الحلال
هوة أنا حاشغل بالى بالعيد اللى بعد شهرين من دلوقت ..خلينا فى اللى إحنا فية
هوة احنا كنا وصلنا لحد فييين؟!!
آة...يبقى كدة خلصنا حاجة رمضان،وهدوم العيد،ومصاريف المدارس...
يبقى فاضل هدوم المدارس..
لما نشوف كدة... يمكن ربنا يسهل والبنات يكونوا ما طولووش،وما كبروش وهدوم السنة اللى فاتت تكفيهم؟؟!!
ولا يعنى مع شوية تبديل فى الهدوم وكل واحدة تاخد هدوم اللى أكبر منها..
وبالطريقة دى نشترى للكبيرة بس!!
أيوة أنا عارفة إن دى تفرقة عنصرية ...لكن نعمل إية..الإييييد..قصييييرة
خلاص كدة الحمد لله رتبناها وعملنا حسبة ماتخرش الميّه...
شوفتو شطارتى بقى؟؟؟
يااااااخبر.....دة أنا نسيت أعمل حساب مصاريف الأكل،والمواصلات،والإيجار،والكهرباء،و............
يوووووووة.....حنعييد الحسبة من الأول ثاااااااانييييييييي.....
يبقى احنا عايزين حاجات رمضان،وندفع مصاريف المدرسة،ونجيب هدوم العيد،وو..........................

حكاية الكادر المتين

كان ياما كان يا سادة يا كرام و مايحلى الكلام إلا بذكر النبى علية الصلاة و السلام
كان فية ملك عظيم حب يرفع من شأن المعلمين فأعلن عن كادر متين يمكن يبقو زي الناس عايشين وأصبح الكل فرحانين
لكن فجأة قال الوزير:يا أيها الملك العظيم ,احنا بلد فقيرولا عندنا آثار وسياحة,ولامعادن وبترول ولا أى حاجة ممكن من الدخل تزيد
وعلى تغطية تكلفة الكادر تعين,طيب قولى أنا أجيب منين؟؟
رد الملك وقال:أنا أعلنت الخبر خلاص,ومش ممكن أكون فى كلامى من الراجعين,اتصرف ودبرنى يا وزير!!
فكر الوزير وقال:طيب نرمى لهم قرشين,وأنا عارف حأقدر أجيبهم منين!
قام الوزير وأعلن إن الكادر حيكون على مرحلتين
وبعد انتظار وقت طويل,ومداولات ورغى كثير........,

اتنفذت المرحلة الأولى من الكادر المتين,اللى كان ناوى يرفع من شأن المعلمين,
لكن اللى ارتفع هوة..........ضغط المعلمين......لأن المرتب ما زادش أكثر من100ج وكل واحد حسب الأساسى بتاعة يابية
وكمان كان الوزير مخبى الخزوق الكبير,لإنهم زودوا الأسعاربدل الضعف ..ضعفين

واللى أعطوة باليمين رجعواخدوة أزيد من الطاق ..طاقين
قال المعلمين:بقى هوة دة الكادر المتين اللى حيخلينا مرتاحين,وللدروس الخصوصية مبطلين,ولقرف وهم الطلاب مستحملين؟؟؟
لكن..ولأن المعلمين على الهم واخدين ومتعودين رجعوا قالو:

ومالو ..هوة احنا كنا طايلين؟أديناأهو راضيين وللأدين والرجلين بايسين ,وللمرحلة الثانية مستنيين,

بس ياريت تكون فعلأً فيها الشفا,وتكون كادر متين
قولوا معايا آآآمييييين
لكن..لما جة معاد تنفيذ المرحلة الثانية من الكادر المتين,اللى المعلمين كانوا لية مستنيين
قال الوزير:استنو...بقي انتو فاكرين إنة بالساهل كدة حتأخدوة يا معلمين ؟!!

لأ..لأ..دة احنا على الإمتحان ناويين,
ويااااارب تكونوا كلكم من..الساقطين.. عشان تبقو من المرحلة الثانية..محرومين
قال المعلمين:طب لية الذل دة يا وزير؟ياريتنا كنا نقدر نقول مستغنيين..دة احنا يمكن نكون للزكاة من المستحقين,

ولأى زيادة مستنيين حتى لو كانت جنيهين اثنين ,وعشان كدة احنا مضطرين,وعلى الإمتحان موافقين ...

بس هوة حيكون فى إية,ومنين؟؟ عشان نكون لية مستعدين ,وقدام الطلاب نبقى مستورين ومش مفضوحين .
قال الوزير:الإمتحان حيكون فى اللغة العربية,وفى التربية,والمادة اللى إنتو فيها متخصصين ,

ولاااازم تنجحو عشان تكونو للكادر مستحقين
وبعدأخد ورد وكلام كثيييير..فى الآخر استسلم المعلمين..وللإمتحان أهم مستنيين,

اللى للنتيجة تقريباً عارفين,ومتوقعين إنهم حيكونو من الساقطييين...

بس فى النهاية مش عارفيين..ياترىحيدعوا لمييين....ولاعلى مييين؟؟؟؟
إية دة..ياخبر..الصبح طلع علينا واحنا لسة سهرانين؟
طيب خلاص كفاية كدة..
لكن لما يخلص الإمتحان حنكون للحكاية مكملين لإننا حنبقى للنهاية عارفين
ويااارب تكون نهاية سعيدة للمعلمين
قولوا ورايا آمين..آمين..آمين

أنا مش ندمانة

ياريت ماحدش يفهم من كلامى اللى قبل كدة إنى ندمانة على دخولى كلّية التربية النوعية فعلاً...فعلاً..أنا مش ندمانة
(دى حتى بقت من كلّيات القمة شفتو أخدت من كام السنة دى؟؟)
يعنى هوة أنا لو كنت دخلت كليّة العلوم كنت بقيت إية؟مصطفى مشرفة؟؟ولا زويل؟؟...لأ..طبعاً كان زمانى لحد دلوقت مش لاقية شغل
لكن بقى نتيجة أفكار بابا( اللى أثبت دائماً ومازال يثبت إنة دايماً على حق)اشتغلت فوراً بعد ظهور النتيجة..ومن غير واسطة
(بلاش نظزة الحقد دي...أصل السنة اللى اتخرجنا فيها كان التكليف موجود والحكومة ربنا يخليها شغلتنا علي طول)
وأهو أدينى مالى ...وحشة؟؟ أدينى رايحة الشغل....راجعة من الشغل....مش مهم بنعمل إية لكن المهم إن أول ماتيجى مسابقة
نشترك فيها على طول بأى حاجة..وحشة..حلوة..أو حتي نص نص......تعجب بقى ولا ماتعجبش مش مهم...نكسب ويطلعو بينا السما
أو ما يجيبوش سيريتنا خالص برضة مش مهم...لأن الكل فى الآخر....يتساوى(شفتو بقى منتهى العدل وحسن التقدير)
المشكلة إنى وبعد كل السنين دى فى المهنة واللى نبات فية ...نصبح فية ..وهيه هيه نفس المسابقات كل سنة.... لكن لحد دلوقت
مش قادرة أفهم المعايير اللى بيقيمو الأعمال عليها...تصوروا؟؟........
أعمل حاجة هايلة جداًوأبذل مجهود جباروأقول بس...دة لما يشوفوة حيعملولى تمثال!!!!!
تكون النتيجة...مش ولا بد..ولما أعمل الحاجة بقرف وسد خانة والسلام!!!!!
تنهال على التهانى واحصل على المركز الأول وكمان أنافس على مستوى الجمهورية......!!
أكيد فية حاجة غلط؟؟!!!....سامعاكو بتقولو يمكن الغلط فية أنا؟؟
أنا كمان بدأت أشك !!!!!!!!

سبع صنايع

لما اشتغلناعرفنا إن شغلتنا اسمها..أخصائى صحافة..وطبعاً كان كل ماحد يسأل إنت بتشتغلي إية؟؟ أرد بكل فخر....أخصائية صحافة
الاقية مافهمش حاجة ويفضل يكمل أسألة وأنا أجاوب لحد مايفهم حاجة واحدة ...اللى هية....(ااااه...يعنى بتقولى الإذاعة المدرسية....هههه طب وهيه دى شغلانة)
شفتو بقى يرضيكو كدة برضة؟؟بقى بعد عذاب 12سنة مدارس و4 سنين كلّية وشحططة أبحاث..ومشاريع..واستديوهات..واخراج.. و... و... و ... الى آخرة تبقى دى الفكرة؟
ماهو أصل الحكاية مش سهلة دة إحنا شقينا لحد ما اتخرجنا
يعنى بعد دة كلة حتى مش عايزين يعترفو بينا اننا مدرسين؟؟...مع اننا بقى شغالين فى المدرسة سبع صنايع.....
لأ..لأ..حاسبو ..ما وصلتش للم الزبالة ورش الحوش
لأ.. احنا شغالين طول السنة مسابقات وطبعاً لازم نشترك فيها و أول ما بنعلن عن أى مسابقة تنهال علينا أعمال الطلاب اللًى
ماصدقوا يلاقو حاجة يطلعوا بيها المواهب المدفونة وأنا بقي أتعب من النقاوة وأبقى مش عارفة أقدم مين ولا مين....أ أ أ
طب بس خلاص ماتزوقوش ..حاقول الحقيقة....
طبعا الولاد مطحونين فى المذاكرة والأبحاث والإمتحانات.. وطبيعى إنهم مش ناقصينى لما أقوللهم إن فية مسابقة مقال صحفى ولا قصة
وانهم لازم يقعدو فى البيت يكتبوا و لازم نواكب التطور وتيجى مكتوبة على الكمبيوتر......
وبالتالى ما فيش حاجة بتيجى ف..(ما تقولوش لحد)..أنا اللى باكتب القصة والمقال وباعمل الأحاديث الصحفية وأنا اللى
باصور و.... و ....
يعنى ما كنتش عايزة أدخل الكليّة عشان ما ابقاش صحفية ..طب اشربي بقى أدينى بقيت جريدة كاملة لوحدى
أنا رئيس التحرير والمعد والصحفي والمحرر والمصور و..... الى آخرة , وكمان فلوس الأنتقالات عليّة وكمان ازاى آخد معايا أولاد عشان يطلعو فى الصور أمال إية اللى يثبت انى تعبت ورحت الزيارة للمكان دة ولا إنى قابلت فلان بية المسئول عن ما اعرفش إية؟؟
وفى النهاية اكتب بالبنط العريض..عمل الطالبان..فلان وفلان
تحت اشراف أمة الله فلانة الفلانية
وبعد كل التعب دة....لا نفوز بأى مركز..أيوة أصل النتيجة بتيجى مراكز الأول والثانى والثالث ..تخيلو بقى بعد كل دة تحصل المدرسة على المركز
الثانى أو حتى الأول ......ياااااافرحتييييي
صحيح...سبع صنايع...والبخت.......!!!!!!!!!!

أهى كلية والسلام

انا لسة فاكرة اليوم دة كأنة امبارح
نجحت فى الثانوية العامة بنسبة70%(ما حدش يبصلهم باحتقار دي كل الكليات يوميها كانت فاتحة دراعاتها وبتقول أهلاً ومرحباً)
لكن أنا بقي كنت مصممة وعاملة مظاهرة وعمالة أهتف....ياعلوم يابلاش....كليّة تانية ماتنفعناش....
وهنا تدخل الوالد ولأول مرة في اختياراتي وأصر على كلّية تربية نوعية وياسلام قسم إعلاااااااااام
يوميها مانمتش...مين؟..أنا؟...كلية إعلام؟...ويقولولى صحافة..تليفزيون...لأ..لأ........أنا لا أنفع مذيعة ولاصحفية وكل شوية اتنطط
من حادثة لتحقيق لخبر وأدور على خبطة صحفية تنطرنى لفوق ...لأ..لأ..لأ..أنا مش عايزةأبقى مشهورة والناس تشاور علية فى كل حتة
(ماحدش يضغط علية ياناس)
ولكن فى النهاية بعد أن أقنعنى والدى بالفرق بين كليّة الإعلام والتربية النوعية وهوة من الآخر....حتبقى مدرسة....
(قالها بافتخار مش عارفة سببة إية لحد دلوقت )
يمكن لإن معظم أفراد العائلة يعملون بهيئة التدريس في مختلف أرجاء مصر المحروسة ..من بلدنا فى الصعيد..حتى القاهرة العامرة..
وكذلك فى الأسكندرية........(أصل عيليتنا كبيرة قوى..وإذاجمعنا المدرسين اللى فيها حنعمل وزارة لوحدنا)
المهم...في النهاية ......استسلمت..والآن بعدمرور السنوات مازلت أسأل ..........
مبسوط يابابا.......أدينى بقيت مدرسة..............والله...يعطينى العافية